Шинэ Монголыг хамт бүтээх О.Цогтгэрэлийн шинэ улс төр гараанаас гарлаа

Ардчилсан намын Үндэсний бодлогын хорооны хуралдаан энэ өдөр буюу 2025 оны наймдугаар сарын 31-ний өдөр болж, УИХ дахь АН-ын бүлгийн дарга О.Цогтгэрэл Ардчилсан намын даргаар сонгогдлоо. Тэрбээр нийт хуралдаанд оролцсон гишүүдийн 196 гишүүний саналыг авсан бол УИХ-ын дэд дарга Б.Пүрэвдорж 82, УИХ-ын гишүүн Ж.Баярмаа 33, Үндэсний бодлогын хорооны гишүүн Б.Отгонбат гурван хүний санал авсан байна. Мөн санал хураалтын дүнгээс улбаалсан УИХ-ын гишүүн Б.Пүрэвдорж, О.Цогтгэрэл нарын хооронд маргааш АН-ын Их хурлаар дахин санал хураалт зохион байгуулж, ялагчийг тодруулах байсан ч нэр дэвшигч Б.Пүрэвдорж хоёр дахь шатны өрсөлдөөнөөс татгалзсан бол дахин өрсөлдөх боломжтой болоод байсан нэр дэвшигч Ж.Баярмаа мөн адил татгалзсан байна.

Ингэснээр УИХ дахь Ардчилсан намын бүлгийн дарга О.Цогтгэрэл Үндэсний бодлогын хорооны гишүүдийн үнэмлэхүй олонхийн саналаар Ардчилсан намын даргаар хоёр дахь шатны өрсөлдөөнгүй тодорч, маргааш болох тус намын Их хурлаар зөвхөн батламжлах ёслол хийх юм.

Ардчилсан намын дарга О.Цогтгэрэлийн тухайд “Шинэ Монголын цугтаа бүтээнэ” уриатай энэ удаагийн Ардчилсан намын даргын сонгуульд оролцсон бөгөөд нэо дэвшигчдийн дунд зохион байгуулсан мэтгэлцээний үеэр “Ардчилсан нам манлайллын стратегийг хэрэгжүүлнэ. Миний хувьд систем бүтээж ялалт авчрахын төлөө бодлогоо хэрэгжүүлнэ. Ардчилсан нам 35 жилийн хугацаанд олонх болж ялж байсангүй. Харин олуулаа болж байсан. Дийлэнх хугацаанд нэг нам эрх барьсан. Аргентин улсын жишээг харахад зүүний популизмд нэрвэгдсэн улсыг хэрхэн засварлах вэ гэдгийг харуулж чадаж байна. Иргэн төвтэй, бизнес төвтэй нам байх, улмаар татварыг бууруулж, иргэдэд боломжийг илүү олгож байж л шинэчлэл ирнэ" хэмээсэн бөгөөд ийнхүү шинэ Монголыг бүтээх хувь улстөрчийнх нь амбиц Ардчилсан намын албан ёсны бодлого болох боломж бүрдэв.