“ӨНДӨР ГЭГЭЭНИЙ БҮТЭЭЛ ШААЗАН УРЛАЛД” ҮЗЭСГЭЛЭН НЭЭЛТЭЭ ХИЙЛЭЭ

Өндөр гэгээн Занабазар мэндэлсний 390 жилийн ойд зориулсан “Өндөр гэгээний бүтээл Шаазан урлалд” үзэсгэлэн өнөөдөр Богд хааны ордон музейд нээлтээ хийлээ.

Нээлтийн ажиллагаанд Засгийн газрын хэрэгжүүлэгч агентлаг Соёл, урлагийн газрын дарга Г.Батхуяг, Их Монгол төслийн санаачлагч Б.Гомбосүрэн нар оролцож, хүндэтгэлийн үг хэллээ.

Шаазан урлаач, чимэглэлийн зураач, дүрслэх урлаг судлалын магистр Х.Хадхүү оюутан наснаасаа эхлэн 40 орчим жилийн турш Өндөр гэгээн Занабазарын уран бүтээлийг судалж, өөрийн уран бүтээлийн гол сэдвийн нэг болгон хөгжүүлсэн бүтээлүүдээ олон нийтэд дэлгэн үзүүлж байна.

Түүний бүтээлд Өндөр гэгээний “Хорин нэгэн дарь эх”, мутрын бүтээлүүдийг шаазан, керамикаар урлажээ.

Үзэсгэлэн 11 дүгээр сарын 14-нөөс 21-ний өдөр хүртэл Богд хааны ордон музейд үргэлжилнэ.